رواية مريم بارت 2

هكشف دلوقتي . ولو لينا نصيب ف الخلفه هنخلف . مالناش خلاص . هنعمل ايه يعنى ! ربنا ليه حكمه ف كل حاجه !! وعدت سنه كمان من غير حتى اشاره واحده . وتعبت وجالى الضغط.. وكنت ادعي واقول يارب إن شاله حتى احمل واسقط . نفسي احس الاحساس ده . والحته ف الحاره مبترحمش . والحريم كانت مركزه مع فاطمه مرات مهران انها مبتخلفش . والكلام وصلنى . ونفسيتي تعبتنى اكتر . وكنت اول مره بعد ما فاض بيا اتخانق انا وابوكي وقولتله لو مكشفناش يا تتجوز ياتطلقنى . ويومها اول مره ابوكي يغضب منى ورفع ايدو عليا . وانا مستحملتش . ولميت هدومي وسبتله البيت ومشيت غضبانه عند بيت اهلى . ومنعت الاكل والشرب ووقعت من طولى . وتعبت والخبر وصله وجه ياخدنى . وابويا شرط عليه اننا نكشف ونشوف سبب التأخير ده من ايه ! يا اما كل واحد يروح لحاله الحاره كلها بتتكلم ع بنتى !! 
.مهران وافق . وروحنا كشفنا . والدكتوره قالت انى عندى مشاكل . ولازم اتعالج . ولازم عمليه . واتصرفنا ف فلوس العمليه  وبعت دهبى . وعملتها .وكنت متأمله خير  وعدت سنه كمان ومفيش آمل . وتعبت اوى وخسيت النص . وكشفنا تانى ويحولونى من مركز ل مركز . وبعدها انا شرط ع ابوكي يتجوز . وزعل منى اوى . وقال يعنى لو أنا الل كان عندى المشاكل كنتى سبتينى واستغنيتى عنى عشان الخلفه ! كنت هتسيبى روح واقفه قدامك . قصاد روح يعالم هتيجي ع الدنيا ولا لأ. وخاصمنى . وبعدها . استسلمنا وقولنا لو ربنا رايد هنخلف . مش رايد خلاص كله بأمره . وبعدها عدي ١٠ سنين .. ١٠ سنين واحنا عايشين كدا .وابوكي كبر . وانا كمان . ومن زعلى ع حالى جالى السكر .. لحد ما ف يوم وقعت من طولى وخدوني المركز . والدكتوره قالت انتى حامل !! ساعتها بس انا ومهران مكناش مصدقين . ومهران عيط ويقولها اكشفى عليها تانى اتاكدي من كلامك الله يكرمك . بلاش امل كداب !! والدكتوره قالتله والله مراتك حامل وف شهرين كمان .. 
انا قومت سجدت ع الأرض مكاني . وصوت عياطي وشكرلى لله كان جايب آخر المركز . وابوكي . اول مره اشوفه بيعيط وبالطريقه دي . وأهلنا عرفو . ومهران كان شايلنى من ع الأرض شيل . وعملت رز بلبن ووزعت ع أهل الحاره كلها . وكنت حاسه اني عيله صغيره . وعرفنا . انى حامل ف بنت وكانو عايزين يسموكي تهانى ع اسم ستك ام ابوكي . وانا رفضت وقولت دي بنتى انا.  وانا سميتها فتون . وابوكي وافق علشان كان حاسس بتعبى الل تعبته ف السنين الل قبلها .. وكملت بعياط .. بس ابوكي كان يقول . العمر بيجرى ياتري هعيش لما اربى فتون . وانا اقوله هتعيش إن شاء الله . الل رزقنا الخلفه بعد كل السنين دي قادر انه يخليك تجوزها وتفرح باحفادها كمان . كان يضحك عليا ويقولي.  مش هيحصل . كان حاسس ياحبيبى.  والحمل تعبنى اوي علشان السكر والضغط ..  وبعد ماولدتك وشيلتك بين ايدينا انا وابوكي . كنا طايرين من الفرحه . وربناكي . وكنتى دلوعة ابوكي. وعمك منصور حجزك لما شافك أوام ل حسن ابنه . وكل ما يشوفك يقول فتون خطيبت حسن ابنى. وحالنا كان ميسور الحمد لله . بس ابوكي تعب وحاول أنه يأمن مستقبلك . بس انتى عارفه انه كان عامل ف مصنع ويدوبك المرتب بيكفى بالعافيه وابوكي حوشلك قرشين للزمن علشان جهازك ..وكبرتى وبقيتى ف أولى كليه . وابوكي تعب واتحجز ف المستشفى . وانتى من يوميها ياقلب أمك شيلتى الهم . صرفتى فلوس جهازك ع علاج ابوكي . ولما الفلوس خلصت . بعتى دهبك واتصرفنا وبعنا شويه من عفش البيت . وابوكي اتوفي من ٤ سنين. مات ومكنش شايل هم حد قدك . ومن ساعتها وانتى شايله الهم .اكتر من خمس سنين !!  من خدمتى لتعليمك . وتشتغلى ف محلات الحاره . علشان تمشي نفسك . واتخرجتى من الكليه . واشتغلتى ف محل موبيلات . وكنتى بتقطعي ف قلبى . لما اشوفك تايهه . مابين مصاريف علاجي ومصاريف البيت ومكنش ف غير معاش ابوكي . ومرتبك من المحل مكنش يكفى بس اكل وشرب. حرمتى نفسك من اللبس . حرمتى نفسك من كل حاجه . حابسه نفسك . ومش عايشه سنك زي بنات الحاره . ولا حسن !! حسن الل سافر من ٣ سنين ومتغرب . الل كان بيقول مش هخليكى تحتاجي حاجه يافتون . واهو كل فين وفين لما يفتكر ويسأل . انتى تعبتى اوى يافتون . انا لو اعرف ان كل ده هيحصلك . كنت اتمنيت انى افضل من غير خلفه . ولا اشوفك ياضنايا شقيانه وتعبانه ومتهانه . كل يوم والتانى حد يخبط ع بابنا . وعايز الايجار . والل عايز الكهربا . والل عايز القسط . اااه ياااارب . حقك عليا يابنتى . حقك عليا وعيطت كتير . أستغفر الله العظيم يارب.
فتون بتسمع امها . ودموعها نازله من تعب الحياه .ومسحت دموعها .جرا ايه ياماما ايه الكلام الل انتى بتقوليه ده انتى قلبتيها نكد ليه كدا وبعدين كل حاجه فى الدنيا دى قسمه ونصيب . ولو كان ف خير انى اتولد اول ما انتى اتجوزتى بابا . كنت جيت الدنيا !! لكن كل حاجه بميعاد . وربنا ليه حكمه ف كدا !! ومين قالك اني شقيانه وتعبانه ها وعيونها لمعت بدموع . وابتسمت بتمثيل . فين التعب ده . انا لو اطول اشيلك من ع الأرض شيل كنت عملتها . واحنا عايشين اهو الحمد لله . واحسن من غيرنا. معاش بابا وشغلى الجديد ف المدرسه . كل حاجه ماشيه تمام . انتى بس الل بتفكرى كتير . وتاعبه نفسك ع الفاضي ! وكل تفكيرك ده تاعب جسمك والنتيجه اهو بتاخدى علاج .. وبعدين ما انا عايشه اهو وزي الفل . لما بكون زهقانه بنزل عند سحر شويه وبطلع عند خالتى ام حسن ... وبروح لعم زينهم .. وكمان حنين زميلتى ف المدرسه ما انتى عارفاها . الل كانت عندنا الاسبوع الل فات ..بت جدعه اوى وبتحبنى وانا كمان حبيتها . وحسن اكيد شغال وشقيان عشان يكون نفسه . هو اخر مره كلمنى قالى ان الراجل صاحب الشغل شادد عليهم شويه . وهيضاعف الشغل أوفر تايم . وكله برزقه . وقالى كمان هانت اهي .. وربنا معاه . وانا سألت عليه عمي منصور قالى أنه كلمنا من اسبوع . وكويس وزى الفل . وانا متاكده انه قريب هيكلمنى .  وبعدين انا مبسوطه اوى