رواية مريم بارت 5

متأخر ليه ..
شريف قعد الله يسلمك .مضغوطين ف الشركه. 
فريده ربنا معاكم .. سليم سافر يبنى 
شريف ايوه .انا كلمته من ٣ ساعات واكتر . قالى انا شويه وداخل ع الطريق السريع .. وزمانه دلوقتي سافر وآمن ع الشحنه وراجع . ثوانى هتصل عليه !!
فريده انا اتصلت عليه يبنى . بس فونه مغلق 
شريف بتحصل كتير . الشبكه ع الصحراوى بتبقى وحشه . انا هتصل عليه !! 
وطلع فونه . واتصل وكان مغلق . وابتسم عشان يطمنها .وبص ف الساعه .. اكيد دلوقتي هو ع الصحراوى . نستنى نص ساعه كدا وهتصل عليه . او ممكن لما تجيله رساله . هيتصل علينا ع طول . 
فريده هزت راسها بقلق . طيب يبنى ربنا يستر . وندهت ع عزيزه ..
عزيزه افندم ياهانم !! 
فريده جهزى الغدا ل شريف بيه .
عزيزه حاضر يا هانم . واتحركت ..
شريف قام وقف . طيب هطلع اغير هدومي وانزل . بعد اذنك ..
فريده قلبها مشغول . هاا !! اه . اتفضل يبنى .
شريف طلع . ودخل الاوضه . واتصل تانى ع سليم . وغير متاح . ومسح وشه بايديه . واتصل تانى. بردو غير متاح . وساب الفون ع السرير . ودخل ياخد شاور . وبعد الشاور خرج من الحمام .. ووقف قدام التسريحه . وسرح شعرو ورش برفان . وبص ع الفون . وراح يشوف يمكن سليم اتصل . لكن متصلش . واتصل تانى ولسه فونه مقفول .. 
شريف اتصل ع خالد . ورد .
خالد الووو .
شريف ايوه يا خالد . سليم كلمك ! 
خالد لأ ياشريف . هو كلمنى وقالى انه خارج من الشركه . ومسافر على بور سعيد ..ومن ساعتها مكلمتوش ولا كلمنى !!
شريف هز راسه تمام ياخالد ..
خالد ليه هو حصل حاجه  
شريف لا ابدا . انا بتصل عليه وفونه مغلق. وكنت بسالك يمكن كلمك وهو راجع !!
خالد لا بصراحه انا رجعت من الجيم وسليم كلمنى .  ونمت شويه . بس اكيد فونه فصل شحن . لان سليم مبيهتمش بحوار التليفون ده ..
شريف هز راسه . ماشي ياخالد . معلش ازعجتك ..
خالد لا يابرو .  ولا يهمك.. واول ما الواد ده يرجع خليه يكلمنى ع طول .. 
شريف تمام . مع السلامه . وقفلو .. 
شريف خرج من الاوضه ونازل ..
خالد بعد ما قفل . حس بالقلق .. وفونه رن . وكانت بنت مديلها ميعاد تجيله الشقه ..
رد عليها بخنقه . بقولك ايه . متجيش حصل مشكله وانا مش ف البيت سلام وقفل ف وشها .. واتصل ع سليم . مره واتنين ومغلق . اوووف ياترى ف ايه سليم لو فونه هيفصل شحن بيتصل عليا ويقولى علشان لو اتصلت عليه ملقهوش غير متاح . وياترى القرار الل قاله ليا  يخليه انه يقفل الفون ! .. وهرش ف قفاه سواقته غبيه بس حريف .. ربنا يستر ..
شريف نزل وقعد ع السفره . وبص ل فريده . حضرتك مش هاتكلى !! 
فريده بلعت ريقها بتعب . لا يبنى انا سبقتك من شويه . سليم وخالد اتغدو بدرى . وانا استنيتك وانت اتاخرت روحت اتغديت . كل انت بالهنا ..
شريف هز راسه . وبدء ياكل ..
فتون قاعده مع فاطمه قدام التلفزيون . والباب خبط . 
فتون قامت ولبست الخمار . حاضر يالل ع الباب .. وراحت فتحت . وابتسمت بسعاده . شيخ محمد ..
محمد السلام عليكم يافتون يابنتى !! 
فتون وعليكو السلام . تعالى اتفضل ياعم محمد ..ولفت راسها . الشيخ محمد ياماما ..
فاطمه لبست الخمار . خليه يتفضل يابنتى . 
محمد دخل ووقف قصاد الباب . وسابه مفتوح زى كل مره .. تعيشي ياحاجه . انا جاى اطمن عليكي . عامله ايه انهردا ! 
فاطمه نحمد ربنا ونشكر فضله . الحمدلله والشكر لله . تعالى اتفضل ياحج !! 
محمد تعيشي ياحاجه . قوليلى مش محتاجه اي حاجه 
فاطمه تسلم وتعيش ياخويا مستوره والحمد لله. ربنا يخليك لولادك قادر ياكريم .  
محمد الحمدلله . مستوره ع الكل ومقولناش حاجه !! بس الجار قبل الدار يام فتون . وانتى عارفه انا  بعتبرك مرات اخويا وربك الل يعلم . معزة فتون عندى . وهي بقى !! بنتى مش بنت اخويا وبس . مريم نصار .
فتون ابتسمت بحب .تعيش ياعم محمد.
فاطمه طبعا ياحج محمد . ده انت صاحب وأخو الغالى الف رحمه ونور تنزل عليه .. وفتون ربنا يعلم ملهاش سيره بالخير غير عنك انت وأهل الحاره . وانت ع راسهم ..
محمد ضحك الله يخيلكى ياحاجه . بس بالله عليكي انتى مش محتاجه حاجه سيبك من البت فتون دي ..دي بت غلاباويه . ودماغ صعيدى اصيله .. 
فاطمه ههههههه . وهي هتجيبو من بره . يلا الحمدلله . تسلم ياحج محمد ويسلم سؤالك علينا ياخويا .. انت واقف ليه تعالى اتفضل اقعد ده بيت اخوك . اعملى شاى لعمك بسرعه يافتون  ..
فتون حاضر يافطوم . تعالى ياعم محمد اتفضل ..
محمد يزيد فضلك يابنتى معلشي ياحاجه. العشا وجبت . انا قولت قبل ما انزل ع الجامع . اطلع اشوفكو واطمن عليكو .. يمكن تحتاجو لحاجه . ولو انى عارف . وبص لفتون .. دماغ حجر صوان مشوفتش كدا ف حياتى ابدا . الله يرحمك يامهران . 
فتون ضحكت . لا والله ياعم محمد . ده انا مسالمه خالص هههههه ..
محمد ايوه ايوه . ع يدي مسالمه دي . يلا الحمد لله انكم بخير واحنا مش عايزين غير كدا . الحق العشا بقى سلام عليكم ..وخرج ..
فتون وفاطمه . وعليكو السلام ورحمة الله ..
فتون قفلت الباب . وقلعت الخمار . وقعدت جنب فاطمه بسعاده .. تعرفى يابطه . انا بحب عم محمد ده اوى . راجل نضيف ومحترم ..
فاطمه اومال يابنتى . ابوكى الله يرحمه مكنش يدخل صنف راجل الشقه هنا غيرو . ولا كان يآمن علينا غير الشيخ محمد وبس . هو الوحيد الل كان يدخل البيت . والشهاده لله عمر عينه ما اترفعت عن الأرض طول ما ببقى موجوده . ولحد دلوقتي . راجل محترم بصحيح . ولا هو وابوكى كانو يسيبو فرض ف الجامع ابدااا ..
فتون مطت شفايفها . اومال سميره مراته ليه ديما بحس انها مبتحبناش . 
فاطمه عوجت بوقها .  بتحسي بس ههههه . هي كدا طول عمرها متحبش الخير لغيرها إبدا . انا افتكر اول ما اشترينا التليفزيون القديم بتاعنا . يختتتتى ع الل عملته .. إلا هي كمان يكون عندها تلفزيون ويكون نفس التلفزيون مش غيرو ابدا . وصوتها كان واصلنا . ومع أنها اصغر منى  . وكنت عايزه انزل بس ابوكي حلف عليه يمين ما أنزل ولا اتكلم .. ولما مكنش بيحصل حمل ليا . كنت ديما اشوف ف عينيها نظرة شماته . بس ربنا كرمنى ف الآخر بتونة قلبى